Захирлын мэндчилгээ

Монголын Хөрөнгийн Биржэд бүртгэлтэй хүнсний үйлдвэрлэл, газар тариалан хосолсон Хөвсгөл Алтандуулга компани олон нийтэд хувьцаагаа санал болгож буйд баяртай байна. Манай компани 20 жилийн өмнө Тариалан сангийн аж ахуй хувьчлагдахад үүсгэн байгуулагдсан. Бид 55 жилийн түүхтэй, олон хүний хүч хөдөлмөрөөр бий болсон аж ахуйг зах зээлийн шилжилтийн хүнд цаг үед сэргээн босгож, бүс нутгийн хэмжээний томоохон хүнсний үйлдвэр болгон өргөжүүллээ.

Энэ хугацаанд газар тариалангийн техник тоног төхөөрөмжийн бүрэн шинэчлэл хийж, гурил, тэжээлийн үйлдвэрийг дэд бүтцийн хамт барьж байгууллаа. Түүнчлэн ажиллагсдыг сургаж дадлагажуулах ажлыг тогтвортой явуулсны үр дүнд инженер техникийн болон гүйцэтгэх түвшинд ажиллах хүчний дутагдалгүй боллоо. Энэ бүхний үр дүнд Алтандуулга брэндийн бүтээгдэхүүн орон нутгийн зах зээлд чанараараа танигдаж, гурилын үйлдвэрлэл маань тогтвортой, өрсөлдөх чадвар өндөртэй, өсөлтийн нөөц боломж ихтэй гэдгээ баталлаа.

  Бид өөрсдийн дотоод нөөц боломжийг сайн дайчилж ажилласан. Компани ашигтай ажилласан жилүүддээ ногдол ашиг хуваарилахын оронд өөртөө хөрөнгө оруулалт хийж, түншүүдийнхээ өмнө хүлээсэн үүргээ биелүүлж, хүндрэл бэрхшээлийг амжилттай даван туулж, хувьцаа эзэмшигчдийнхээ хөрөнгийг  100 дахин өсгөж чадсан билээ.

  Цаашид бид улсынхаа хүн амыг эрүүл хүнсээр хангахад жинтэй хувь нэмэр оруулж, хөрөнгө оруулагчдын хөрөнгийн үнэ цэнийг нэмэгдүүлэн, олон улсад танигдсан, үндэсний тэргүүлэгч компани болохоор зорилт тавин ажиллаж байна. Одоо зах зээлээ тэлж, бүтээгдэхүүний нэр төрлийг олшруулан, үйлдвэрлэлийн хэмжээг өсгөх боломжтой цаг үе ирээд байна. Үүнд шаардагдах санхүүжилтийг олон нийтэд хувьцаагаа нээлттэй арилжиж босгох зорилгоор энэхүү танилцуулгыг бэлтгэлээ.  

  Хөрөнгө оруулагч та бүхнийг манай компанийн хувьцаа эзэмшигч болж өөрийн хөрөнгийг өсгөх, орон нутгийн хөгжилд бодитой хувь нэмэр оруулах, Хөвсгөл нутгийн шимт хөрсний дээж болсон эрүүл хүнсний үйлдвэрлэлийг дэмжин бидний цаашдын хөгжлийн түүхийг бүтээлцэх таатай боломж хүлээж байна.

  Бид та бүхний итгэлийг алдалгүй, сайн засаглалыг гол зарчимаа болгосон үндэсний тэргүүлэгч компаниудын нэг болох болно.  Мөн өнөөдрийг хүртэл бидэнд итгэж хамт явсан хувьцаа эзэмшигчид, ажилтнууддаа талархал илэрхийлье.

Гүйцэтгэх захирал      Д.Дуламсүрэн